ثلاث نساء وثلاث قصص " الجزء الرابع "

السلام عليكم ورحمة الله وبركاته،

بعد ثلاثة شهور من مكوث ربى في بيت حياة فاجأتهما غدير بخبر أسعدهن جميعا...

حياة: آلووو

غدير: آلوووووو,مرحبا حياة كيفك وكيف ربى معاك مغلبتك ولا كيف؟

حياة: منيحة نشكر الله هياتها مسليتني والله.

غدير: وكيف فارس لساتكم عم تحكو مع بعض ؟

حياه: اها واتفقنا لما ينزل على فلسطين نشوف بعض؟

غدير: ولي لو ماتصلت فيك ماكنت حكتيلي صح؟

حياة: مايروح فكرك لبعيد , مافي شي بس صداقة , المهم انت شو اخبارك؟

غدير: في خبرية حلوة كتير ومش عارفه كيف احكيها واااااااااااااااااااااااو

حياة: شو مالك يامجنونه ليش عم تصيحي؟

غدير: عمر طلب ايدي للزواج؟

حياة: واخيرا تجرأ الاخ الف مبرووووك والله انبسطتلك كتير؟

غدير: شايفة واخيرا دبحني الاخ قبل ماينطقها يعني لو تاخر شوي كان انا طلبت ايدو.

حياة: والله بتعمليها.

ضحكتا الاثنتان معا , وعندما عادت ربى من الجامعة أخبرتها حياة بالتطورات الجديدة فاتصلت على غدير وباركت لها وتمنت لها حياة سعيدة مع عمر بعدما لامتها على اتصالها بحياة بدلا من الاتصال بها أولا.

وفي المساء بكت ربى كثيرا وخالجها شعور بالحسد اتجاه ابنة خالتها غدير كما بكت حياة كثيرا وخالجها شعور بالحسد اتجاه ربى وغدير وتأكدت أن في هذا المساء زادت العوانس في البلدة عانسا جديدة .

اجتمعت الصديقات مرة أخرى في بيت حياة وذلك لأخر مرة وهن جميعهن عزباوات ...

ربى: غدير بتتذكري هالة صاحبتي من طولكرم يللي تعرفت عليها في بيت اهلي .

غدير: اه , هاي اللي حبت سامر ابن جيرانكم .

ربى: اها, انقرا فاتحتها عليه.

غدير: خبرية حلوة, الف مبروك الها.

ربى: لسا مانتهت.

غدير : ليش شو صار.

ربى: عمها فركش القصة لحتى ماتروح الورثة براة العيلة وخطبها لابنه وابوهها وافق.

حياة: العما , شو هالقصة , حرام هاد الحكي , مابصير الخطبة على خطبة .

ربى: شايفه , وهلا هي متل المجانين وبتحكي لاهلها ماباخد غيرو وسامر راح على المستشفى بسبب هالقصة, وابوها اقتنع بفكرة اخوه ومصمم يزوجها لابن اخوه وخبطة وقايمة.

حياة: الاخلاق عمالها بتروح شوي شوي من هالشعب وكل مابالنا بنصير نشبه اخلاق اليهود اكثر من اخلاق المسلمين.

غدير: مسكينة حظها لسا اشنع من حظك.

ربى والدمع بعينيها: شايفه, يللا تصبحوا على خير ياصبايا.

حياة: شو يللي حكتي ياغدير.

غدير: والله مو قصدي , طلعت هيك من غير تفكير , هلىء كمان شوي بروح وبعتذر منها.

حياة: لا خلص بلاش تكبريها , هلىء بتروق لحالها وبتصبح ولاكاإنو صار شي.

حاولت ربى عدم البكاء هذه المرة وتقبل فكرة أن نصيبها هو احمد وليس رامي ولكنها فشلت فسمحت لنفسها بالبكاء ولكي تستطيع النوم مارست الطريقة المعتادة لمواساة نفسها فأخذت تتذكر بعض اللحظات التي قضتها مع رامي وتذكرت أخر إيميل بعثه لها ليخبرها عن وضعه وكيف أصبح مديرا لإحدى الشركات في دبي مجددا لها عهده بالبقاء في انتظاره حتى تصبح له في يوم من الأيام, وفي هذه اللحظة اتصل احمد ليطمئن عليها فأخبرته أنها متعبه قليلا وأنها لا تستطيع أن تتحدث إليه الليلة, وفي قرارة نفسها شعرت كم هي سيئة وخائنه بنفس الوقت لأنها مرتبطة بشخص وقلبها لشخص أخر.

في الصباح اجتمعت الفتيات على وجبة الإفطار وأخذن يتحدثن بأمور عادية حدثت معهن وكان شيئا لم يحدث بالأمس

غدير: خبرينا حياة امتى رح يجي فارس على فلسطين.

حياة: كمان اسبوع.

ربى: والله وامتى رح يجي ليشوفك؟

حياة: بعدها باسبوع.

غدير: فكرت تحكي تاني يوم, كتير اسبوع.

حياة: قلتلك شيلي الفكرة من راسك , اللي بينا صداقة وبس وهو كمان زمان مانزل على فلسطين وبود يشوف اهلو يعني يادوب يقدر يجي بعد اسبوع ليشوفني.

ربى: حكتيلي من وين هو؟

حياة : من جنين.

غدير: والله ياحياة ماتوقعت نهايتك تكون في جنين.

حياة: غدير بلا تقلة دم على هالصبح لاجنين ولا شي ,هانحن باقون في نابلس الصمود.

وفجأة صرخت الفتيات بصوت واحد وركضن باتجاه باب البيت ليرين ما حدث وكان هول المفاجأة كبيرا ولم يصدقن أنهن نجين من هذه الحادثة.

كان الدمار الذي خلفه القصف الإسرائيلي للبيت المجاور كبيرا وعرفن فيما بعد انه كان يأوي احد المطلوبين من كتائب شهداء الأقصى وقد توفي طفلان ورجل جراء القصف ونجا المطلوب في آخر لحظة.

وبعد هذه الحادثة أجلت ربى بناء على طلب والدها الفصل ما قبل الأخير ورجعت إلى طولكرم حتى يحدث الله أمرا كان مفعولا.

كما أن غدير طلبت من حياة الانتقال إلى رام الله كون الضرر فيها اخف من نابلس إلا أنها رفضت قائلة لها: ولايمكن اخلي سبب طلوعي من نابلس صواريخ الجيش الاسرائيلي.

يتبع الجزء الخامس..>>>

والله زمان يا تيرا
عنجد اشتقنا لتواجدك و لتكملة هاي القصة الممتعة
يسلموو ايديكي و مشكورة على جهدك الكبير
يلا بدي اشوف شو تكملتها كلها
تقبلي مروري
تحياتي

بشكرك على مرورك

وأنا كمان اشتقت للمنتدى

وان شالله ما بغيب عن المنتدى